Det gode livet på naustet

- Velkomen inn! Kan eg by på ein iskald Cola?

Martha Hammersland opnar dørene til det 40 kvadratmeter store naustet i Skjersholmane Båthamn.

På den eine langsida er eit plassbygd kjøkken, og ho hentar raskt ut to colaboksar frå kjøleskapet. Langbordet i midten av rommet vitnar om at naustet kan bli brukt til å samla både familie og vener.

- Me bruker naustet året rundt, smiler ho og nikkar mot ei bålpanne som står plassert like innanfor naustdøra. – Denne er det heilt magisk å fyre opp i, både på svale sommarkveldar og resten av året.

DET VAR I fjor sommar at familien Hammersland Eldøy kjøpte naustet, som ligg idyllisk plassert på enden av den gamle moloen. Eit kommunalt friluftsområde er næraste nabo, og Martha har fått sett opp ei trapp ned til sjøen, til fri ferdsel for alle. Naustet ligg i rekkje med fem andre, og er utstyrt med kaifront og flytebrygge.

- Me har framleis ting me ynskjer å gjera her, og gler oss til å setja i gong med ulike prosjekt. Me bur i Hornelandsvågen, så det er enkelt for oss å stikka innom, seier ho.

Frå Skjersholmane Båthamn er det kort veg til badestrender, Leirvik sentrum og andre utferdsmål. Øyriket Bømlo med den fantastiske vestkysten ligg berre ein kort båttur unna, det same gjer skjergardsidyllen på Fitjar.

- Det er mange flotte plass i området som er verdt eit besøk med båten. Då er det midt i blinken å ha eit naust med båtplass. Her kan me bruka heile dagen i solveggen og bada, før me tek ein tur ut på fjorden med båten. Det er heilt perfekt.

FAMILIEN HAMMERSLAND ELDØY har budd i Hornelandsvågen i over tjue år, og kjenner difor området rundt Skjersholmane godt.

- Me har alltid nytta oss av turløypene her, frå Alnavågen til Størjevikjo. Ungane er praktisk talt oppvaksne ved sjøen, og John Ståle og eg har alltid vore glad i båtlivet.

Familien vart difor nysgjerrige då Fronta presenterte planane om utbygging av naust med båtplassar. Etter kvart vaks tanken om eige naust fram hos heile familien.

- Dei seinaste åra har området blitt oppgradert med ny molo, båthamn og naust. Fronta er ein dyktig utbyggar som ikkje gjer noko halvvegs.

Martha legg til at Skjersholmane er eit område som er blitt meir populært i takt med utbygginga som er gjort.

- Fleire og fleire nyttar seg av området. Det er mykje meir aktivitet her enn for berre nokre år sidan. Ungdomar kjem hit for å bada, og dei har til og med laga eige «dødse-tårn» her borte, smiler ho.

Til saman skal 48 naust byggast i båthamna, alle på 40 kvadratmeter. På fellesarealet er det servicebygg, parkeringsplassar og drivstoffanlegg.  

- Berre det at me kan fylla drivstoff på båten vår her, har mykje å seia.

No gler familien seg stort til alt står ferdig.

- Det kjem til å bli fantastisk her nede, smiler ho.

PÅ UTLIGGAREN FORAN naustet ligg ei knallgrøn jolle av merket Summer Fun og duvar i takt med bølgjene. Den er det tvillingane på 13 år som køyrer, og Martha understrekar at det er viktig for ho å læra ungane opp til å ha respekt for sjø og båtliv.

- Me bur trass alt på ei øy, så det er viktig at dei blir vane med båt. Dei køyrer saman med venene sine på fjorden her, og plasseringa på naustet gjer at eg kan stå på bryggekanten og følgja med. 

Sjølv er Martha «Vikjo-jente», oppvaksen ved familien sitt naust i Aslaksvikjo. Mange gode minne herifrå gjorde også sitt til at familien valte å kjøpe naust i Skjersholmane Båthamn då moglegheita baud seg. Båtlivet har alltid stått hjarta hennar nære.

- I tillegg til ungane sin Summer Fun har me ein daycruiser som me reiser på dagsturar med. Den er tjuetre fot, og heilt perfekt storleik på. Når ein bur så sentralt som me gjer, har me ikkje sett behovet for ein båt me kan overnatta i. Det er så mange fine plassar å reisa på dagsturar til – så kan me heller nyta sommarkveldane i naustet.  

NO GLER FAMILIEN seg til late sommardagar på naustet, og Martha fortel at besten har laga krabbekiste som dei har håp om å fylla i løpet av sesongen.

- Det er godt med krabbeplassar langs berget her. I tillegg er det rikeleg med gode fiskeplassar, så for den fangstinteresserte er det berre å kasta snøret uti og dra opp, smiler ho.

Martha understrekar at ho håper at framtidige kjøparar ynskjer å tilbringa tid i nausta – ikkje berre bruka dei til oppbevaring.

- Det kjem til å bli eit flott samlingspunkt her. Ferjekroa ligg like ved, og ein kan springa bort og kjøpa seg is på varme dagar. Blir ein lei av å sitja i solveggen, kan ein ta seg ein dukkert. Om kvelden slår me opp naustdørene, kokar krabbe og inviterer vener og familie. Livet er godt ved sjøen!