Pendlar med Stordflyet
til Stortinget

Stordflyet spelar ei essensiell rolle for at stortingsrepresent Odd Harald Hovland skal kunna pendla mellom heimen sin på Bømlo, til Stortinget i Oslo kvar veke.

Ute i havgapet, inst i fjorden, i små bygder og grender, og i sentrale byar finn du dei: Fiskeoppdrettarar, HR-sjefar, ingeniørar, prosjektleiarar og politikarar. Felles for dei alle: Dei kan bu og leva lokalt, og samstundes ha heile Noreg og verda som sin arbeidsplass.

Ved Stord lufthamn møter me breidda i norsk næringsliv. Menneske som driv verdiskaping på kryss og tvers av vårt langstrakte land. Det osar kompetanse og ambisjonar der dei sit, med pc-en på fanget og med øyroklokker på. Nokre av dei reisande skal vidare ut i den store verda, for når ein landar på Gardermoen éin time seinare, har ein faktisk verda for sine føter.

Torsdag ettermiddag møter me Odd Harald Hovland på Stortinget i Oslo. Sidan 2021 har han vore stortingsrepresentant for Hordaland og medlem av justiskomiteen. For nokre år tilbake, frå 2011 til 2019, var han ordførar for Bømlo kommune.

Stortinget, den staselege og flotte bygninga, har vore Hovland sin arbeidsplass i 2 år. Pendlartilværet har eksistert like lenge. Torsdagar plar han reisa heim til Bømlo med Stordflyet. Denne dagen er ikkje noko unntak, og me får vera reisefølgje.

Som stor lokalpatriot, er Hovland bevisst på å nytta den lokale flyplassen så ofte som råd. Han ser enorm verdi i å ha ein lokal flyplass.

- Det er høgst naudsynt at me har eit lokalt flyplasstilbod. Stord lufthamn er ein viktig vekstimpuls for heile regionen, samstundes som den gir vekst i næringslivet. Det handlar om å ha moglegheit til å reisa og få besøk av nære og kjære, det handlar om regional vekst og det handlar om verdiskaping på kryss og tvers av landet vårt. Flyplassen bidrar til å gjera regionen vår attraktiv, for om unge i etableringsfasen og folk som jaktar nye jobbar skal kunna flytta ut i distrikta, er dei heilt avhengige av infrastrukturen og god kommunikasjon. Stordflyet er difor ei viktig brikke, fastslår han.

Å fly er blitt eit meir tidseffektivt transportmiddel enn før i tida. Den høge regulariteten og frekvensen gjer det mogleg å pendla med fly. Og slik kan ein flytta kompetanse på kryss og tvers, utan at folk treng å byta bustadadresse. Heile 15.431 passasjerar nytta seg av Stordflyet si Oslorute i fjor.

– Eg reiser heim i mitt valdistrikt når eg kan, for det er der eg trivst. Men så har eg ein viktig og gjevande jobb å gjera her på Stortinget. Me som jobbar her har ein veldig spesiell arbeidskvardag, med mange møter både på dag- og kveldstid. Då er det ein grei måte å gjere det på, seier Hovland om kvifor han vekependlar.

Kunne du tenkt deg å flytta til Oslo?
- Nei, svarer han kontant.
- Fleire tenkjer ikkje på at me er folkevalde for fylket me er innvalde frå. For meg inneber det at eg prøver å vera så mykje som mogleg heime på Vestlandet. Møtefri periode i eksempelvis sommarsesongen gjer at eg i større grad kan representere fylket, samstundes som eg får verdifull tid saman med kona mi heime på Bømlo. Men ettersom to av borna våre bur i Oslo-område, hender det ho tek seg ein helgetur hit også, seier han og legg til.

- Men så er det slik at det å vera stortingsrepresentant er ganske travelt og uforutsigbart, så når ein vel å gå inn i dette yrke, må ein trivast og rekna med mykje reising og lange dagar. I løpet av ei veke er det mange møter ein skal delta i, både på Stortinget og rundt om i landet hos ulike organisasjonar og institusjonar. I travle periodar reiser eg ofte frå Stord allereie søndags ettermiddag, og heim att igjen på torsdagen eller fredagen, noko som fungerer veldig fint.