- Du har så mange moglegheiter her!

Kasper, Ingveig og Thomas er viktige brikker når framtida til Leirvik AS skal formast.

Med mange moglegheiter fortel dei tre unge vaksne om ein arbeidskvardag som er både spanande og lærerik.

I produksjonshall sju er Kasper Mæland i full gang med arbeidsdagen, tolv meter over bakken. Det blenkjer i blått i det 18-åringen nyttar sveiseapparatet til å sveisa saman ulike aluminiumsplater.

Platene er ein del av ein splitter ny bustadmodul som skal stå klar i 2024.

Som aluminiumskonstruktør former og samanføyer han plater, røyr og profilar av aluminium.

- Det er spanande å jobba hjos Leivik. Arbeidsdagane er varierte, og eg får prøva meg på mange ulike jobbar. Det gjer at eg trivst veldig godt, smiler han.

Ingveig Stensletten har ein bachelor i økonomi, men ei stillingsannonse frå Leirvik AS trigga ho til å søka som lærling innan kontor- og administrasjonsfaget.

- Eg tenkte at dette såg utruleg spanande ut, og det skremte meg ikkje i det heile tatt at det var ei stilling som lærling, smiler ho.

Sidan ho ikkje har yrkesfag i botn, skulle Ingveig eigentleg gått i lære i fire år, men på grunn av anna relevant utdanning har ho fått korta det ned til to år. No har ho eit halvt år igjen før ho skal ta fagprøven.

- Med fagbrev i kontor- og administrasjonsfaget har eg eit sært godt grunnlag for fleire typar stillingar innan sal, kundeservice, rekneskap og administrativt arbeid, forklarer ho.

Thomas Halderaker (25) er Structural Engineer og sit i tredje etasje i "nybygget" frå 2015. I det opne kontorlandskapet er alle på "hei" med kvarandre. På skjermen har han teikningar av ein bustadmodul som snart skal produserast, og jobbar med fleire spanande prosjekt samstundes.

- Jobben min er å teikna grunnlaget for det som dei lagar ute i produksjonen, forklarer han. - Difor jobbar eg for det meste i 2D eller 3D. Som Structural Engineer skapar me forma og strukturen til prosjekta våre, eksempelvis å teikna opp bustadmodular. Det er utruleg gøy å sjå det du har vore med på å teikna bli realisert.

Thomas starta karrieren som lærling hos Leirvik AS i 2015. Han tok fagbrev i aluminiumkonstruksjonsfaget, og fekk sidan tips om å søka seg inn på Stord-modellen.

- Då eg begynte i lære, kjente eg at eg eigentleg ikkje var heilt ferdig med utdanning. Eg ynskte å ha den praktiske erfaringa i botn som fagbrevet gir, men visste at eg var motivert for å utdanna meg vidare. Eg tok difor eitt år påbygg, for å halda alle moglegheiter opne. Det var før eg fekk vita at Stord-modellen var eit alternativ, fortel han.

Stord-modellen er eit initiativ frå fire av dei største industribedriftene på Stord. Bakgrunnen for initiativet er at ein ønskjer å gi fagarbeidarar eit relevant vidareutdanningstilbod, og redusera kompetanselekkasje til større byar.

Modellen følgjer eit toårig utdanningsløp, og gjennom utdanninga kombinerer ein difor jobb og skule.

- Eg jobba i to veker og gjekk på skulen i ei veke. Det var ei fin ordning. I tillegg sponsa Leirvik utdanninga mi, noko som gjorde at eg kom ut med i overkant av 90 prosent av løna mi medan eg var under utdanning. Eg er veldig nøgd med løysinga, understrekar Thomas.

Han gjekk Stord-modellen saman med to andre kollegaer frå Leirvik.

- At me var tre stykk som gjekk saman, gjorde alt mykje enklare og meir motiverande. Eg er glad for at eg fekk denne moglegheita til å utvikla meg fagleg. Noko av det som er ekstra kjekt med å jobba her, er at du blir oppfordra til å ta kurs og vidareutdanning. Det set eg pris på.