- Opnar for ein ny måte å jobba på

DET ER EIN NY måte å jobba på, som gir oss uendeleg mange moglegheiter med desse maskinane, seier Christian Fredheim.

Som leiar for vedlikehald har han ei sentral rolle når Leirvik AS no har investert 48 millionar kroner i fire nye maskinar:

• Ein vasskuttar
• Ein plasmakuttar
• Ein profilkuttar
• Ein sveiserobot

Investeringane gir ei stor styrke inn mot den globale marknaden, og er eit viktig ledd i digitaliseringsplanen som Leirvik AS vedtok for fem år sidan.

- Heile maskinparken er moderne og avansert, seier Fredheim og viser veg til Hall 6 der profilkuttaren nyleg kom på plass.

- Maskinane er svært effektive og stiller andre krav til fagmannen. Det gjer at me må tilpassa, og treng ein anna kompetanse no enn tidlegare. Det manuelle arbeidet vil vera viktig også i framtida, og med dei nye maskinane blir arbeidsdagen enklare, tryggare og meir effektiv. Automatiseringa gir svært mange moglegheiter, og det er veldig spanande å få ta del i dette.

SJØLV STARTA FREDHEIM si reise i industrien då han tok fagbrev som CNC-operatør. CNC står for Computer Numerical Control, og operatøren brukar datamaskin til å styra mekaniske maskinar og laga komplekse delar i metall eller anna materiale. Det omfattar også planlegging, programmering, produksjon og overvaking av prosessen.

Etter fleire år med reising, opparbeidde han seg ei solid og brei erfaring innan fagfeltet. For eit drygt halvår sidan vart han tilsett som ein del av Prefab-prosjektet til Leirvik AS. I dag stortrivst han med ein variert arbeidsdag i ein spanande bransje, og skryt over det gode arbeidsmiljøet.

- Det å løysa daglegdagse problem med teknisk program synest eg er tiltalande. Det er mange tekniske utfordringar å løysa, og den nye arbeidskvardagen med avanserte maskinar er spanande å ta del i. Dette er framtida, slår han fast.