Bli med oss og form framtida!

FOR FEM ÅR SIDAN fekk Dorota nok av alt som heitte industri og entreprenørskap. Ho ville prøva noko nytt - og svaret blei eige yogastudio på Leirvik.

- Du skulle kanskje tru at yoga og ingeniøryrket er svært ulike, men det er det altså ikkje! I alle fall ikkje når du ser vekk frå den fysiske biten. Eg tenker strukturering i yogatimane mine, så det er eigentleg ganske samanliknbart med korleis eg jobbar som prosjektleiar, smiler ho.

I dag jobbar Dorota 70 prosent som prosjektleiar hos Leirvik AS og driv eige yogastudio resten av tida. Ho skryt av arbeidsgivaren som legg til rette for at ho skal kunna kombinera.

- Det var godt å få kollegaer igjen! Leirvik er dessutan svært fleksible og legg til rette på best mogleg måte slik at dei tilsette skal trivast.

Sjølv om kvardagen er travel og det er mykje ansvar som kviler på hennar skuldre, blir ho ikkje lei.

- Kva som driv meg? Eg er workaholic, ler Dorota før ho blir alvorleg. - Nei, det som driv meg er ansvaret og det å få ting. Det er ei enormt god kjensle når me lukkast, og på vegen fram får me verkeleg utfordra oss. Så blir eg veldig motivert av å jobba saman med andre dyktige menneske.

I HALL 5 jobbar Kristian Økland (29) med morgondagens teknologi. Som Robotic Engineer har han spanande dagar når framtidas Leirvik AS blir forma.

- Om det er noko me ikkje får til, har me ingen å spørja. Det er nybrottsarbeid, og det er jo berre me som kan det, seier han.

Kristian har fagbrev i aluminiumkonstruksjonsfaget. Han tok læretida si i ei anna bedrift, men då han jobba på Sverdrup-prosjektet saman med fleire frå Leirvik AS, treivst han så godt saman med dei at han like greitt søkte om å få begynna.

- Eg fekk faktisk tilbod om læreplass hos Leirvik, men eg takka nei. Grunnen var at eg trudde eg ville bli ein arbeidsmaur, ein i mengda. Det angrar eg på den dag i dag, fortel han.

Heldigvis hadde Leirvik ei opning til han, og etter å ha jobba eitt år, fekk han tilbod om toårig fagskule gjennom Stordmodellen.

- Det var utruleg lærerikt, og allereie etter det første året fekk eg tilbod om jobb i den nye robotavdelinga som Leirvik etablerte. Det takka eg ja til, samstundes som eg fullførte fagskulen.

29-åringen er arbeidsvillig og lysten på å læra meir.

- Det er mange moglegheiter i bedrifta for den som ynskjer å jobba og få meir utdanning og kompetanse. Her får du verkeleg utvikla deg, understrekar 29-åringen, som i desse dagar kombinerer jobben med prosjektplanleggingskurs hos HVL.

- Så lenge du viser at du vil jobba, blir du satsa på.

SAMAN MED TRE andre er Kristian ein del av robotavdelinga til Leirvik AS.

Den seks meter lange roboten sveisar i aluminium, ikkje stål, som dei fleste andre robotar. Dette er ein forløpar til ein robot på tjuefire meter som blir implementert i desse dagar.

Robotane er unike, og er viktige brikker i framtidas prosjekt.

Frå kontoret jobbar Vebjørn Jansen med ein "digital tvilling". Han programmerer og gir roboten instruksjonar og kommandoar. Så testar dei det ut i verkstaden, der roboten er.

- Det kjekkaste er når eg prøver eit nytt laserprogram, og det blir rett ti av ti gonger. Då får eg ei utruleg meistringskjensle over å ha klart å få det til å fungera så godt, smiler han.

Roboten vart teken i bruk i 2020, og med denne vil Leirvik først og fremst finna ut korleis automatisering kan hjelpa til med å produsera veggar og skott til bustadkvarter meir effektivt.

Kompetansen og kunnskapen som Kristian og kollegaene opparbeider seg, vil difor vera essensiell i framtida.

- Det er spydspissen av teknologi me jobbar med her. Det er utruleg spanande å få vera ein del av, avsluttar han.