Jobbar fremst i det grøne skiftet

Når innovative tech-løysingar møter det grøne skiftet, er resultatet hardtslåande, tidsbesparande og brukarvenleg.

- Det har vore utruleg spanande å få jobba med Eviny på dette prosjektet. Resultatet er ei oversiktleg og brukarvenleg løysing på ei kompleks og samansett utfordring. Det er givande å ta del i målet om utsleppsfrie bygg- og anleggsplassar. Det er banebrytande arbeid Mobil Energi Eviny jobbar med, og det er utruleg kjekt å få delta så langt framme i det grøne skiftet, seier Knut Marius Sundt.

Han har rolla som tech lead i Ilder sitt prosjekt-team, og har jobba fram løysinga saman med andre Ilderar.

Sundt sit på Ilder sitt kontor på Stord, og flytta nyleg inn i splitter nye lokale i Kunnskapshuset. Her jobbar han tett med Ilder sine andre kontor i Bergen, Fauske og Stokmarknes.

Eyvind Bohne-Kjersem, leiar i Eviny Mobil Energi, skryt av leveransen.

- Me er svært nøgde med løysinga som Ilder har levert - frå Effektkalkulatoren til kontrollpanelet. Det har gjort kvardagen vår mykje enklare. Ilder finn gode løysingar og strukturerer data på innovative måtar. Dette hjelper oss også i forhold til miljørapportering, seier han.

OFTE VEIT IKKJE KUNDANE kva løysing dei treng, før dei kontaktar Ilder. Det er vanskeleg å vita kva som er mogleg å få til når det gjeld teknologi og innovasjon – difor oppmodar Sundt kundar som er interessert til å ta kontakt.

- Fortel oss gjerne om di utfordring eller problemstilling, så finn me ei løysing. Kundane som kjem til oss treng hjelp med alt frå sikkerheitstiltak til utvikling av avanserte appar og komplette programvaresystem.

Koding er difor berre ein av mange ting Ilderane gjer i løpet av ein arbeidsdag.

- Me driv med mykje meir enn det! Totalen er appellerande, utfordrande og interessant. Når du jobbar i Ilder går kundekontakt og problemløysing hand i hand. Du får vera kreativ og finna gode løysingar, samstundes som du hjelper kunden til å få ein betre kvardag.

Om sjølve programmeringa trekk Sundt parallellar til det å vera forfattar.

- Det å skrive orda er det minste problemet. Det er innhaldet som er krevjande og utgjer den store forskjellen. Slik er det med kodinga også. Det er ikkje eit problem å skriva inn kodane, men å finne ut kva ein skal skrive for at løysinga blir bra.

ILDER HAR INTRODUSERT nytenking og innovasjon til Mobil Energi-prosjektet.

- Ilder består av ein framoverlena gjeng som tek utfordringar på strak arm. Dei er svært kompetente, og bryr seg verkeleg om å finna gode løysingar på våre problemstillingar, skryt Bohne-Kjersem.

Han opplever at Ilder har stor eigeninteresse i løysingane som vert levert.

- Me ser at dei legg ned svært mykje stoltheit i jobben, og er genuint opptekne av at løysingane skal fungera optimalt både for oss og kundane våre. Det set me pris på.

Det var ingen tilfeldigheit at nettopp Ilder fekk Mobil Energi-prosjektet. Bohne-Kjersem fortel at dei har samarbeidd med Ilder tidlegare, mellom anna på Plug Insight.

- I Plug-prosjektet leverte Ilder ei løysing for oss som gjer det mogleg å overvaka anløp med landstraum både i sanntid og med historiske data, ha oversikt over driftsstatus og sjå anlegg og fartøy i sanntidskart. Den gode erfaringa frå dette var bakgrunnen til at me valte Ilder for overvakingssystem av batteribankane, utdjupar han.  

DET ER AVGJERANDE med god design og brukarvenlegheit for å kunna samla omfattande data i gode og velfungerande system.

- Me tek alltid utgangspunkt i brukaren og har eigne interaksjonsdesignarar med i teamet for å sikra at løysingane treff kunden sine ønskje og behov. Interaksjon og brukarvenlegheit kjem i første rekke. Det er viktig at avanserte data blir framstilt på ein måte som er enkel å oppfatta og lesa.

I prosjektfasen blir difor funksjonalitet, intuitive løysingar og brukarbehov kontinuerleg testa og lagt til grunn for vidare arbeid.

- Me har eigne testgrupper som får prøver seg undervegs i prosjektet. Det er viktig at me har ei felles forståing og at irritasjonsmoment blir luka ut. Eit prosjekt skal vera sjølvforklarande og utruleg enkelt for både kunde og brukar – sjølv om det er avanserte data og  store mengder informasjon, understrekar han.