Aleksander er førstegongskjøpar:

Aleksander Husevik (30) har brukt over eitt år på å leita etter bustad på Stord.

Med gode råd frå eigedomsmeklar Bente Faksnes i Eiendomsmegler1 håpar han å snart finna draumebustaden.

- Eg har vore på fleire visningar enn eg kan telja, seier Aleksander Husevik med eit smil.

30-åringen flytta heim igjen til Stord for over eitt år sidan og jobbar som køyrelærar for Sunnhordland Trafikkopplæring.

Med full jobb og ein hektisk timeplan er han klar for å koma seg inn på bustadmarknaden, og leiger leilegheit i påvente av eit kjøp. Dermed har han ingen problem med å betena eit lån.

- Eg har vore med i nokre bodrundar, men har førebels tapt alle. Grunnen er at bustadane har gått langt over prisantyding. Eg gir ikkje opp, men prøver å vera tolmodig, seier han.

EIGEDOMSMEKLAR BENTE FAKSNES trur tida er moden for å koma seg inn på bustadmarknaden, og forventar ikkje at prisane går ned med det første.

- Marknaden er veldig bra akkurat no, og både einebustadar og leilegheiter har fått eit prisløft. Det gjer situasjonen for unge som Aleksander som skal kjøpa for første gong. Eg vil råda førstegongskjøparar til å setja seg godt inn i bustadmarknaden. Gå på masse visningar, bli kjent med området du vil bu i og finn ut korleis prissjiktet er på det du ynskjer deg. Du kan gjerne melde deg som interessert slik at du får innblikk i bodrundar og får ei kjensle av kva ting blir selt for.

Ho oppmodar også unge førstegongskjøparar til å bruka meklaren aktivt.

Meklaren skal vera ein mellommann mellom seljar og kjøpar, og kan gi gode anbefalingar til begge partar. Spør og grav om alt du lurer på, tipsar Faksnes.

- Mange tenker at meklaren er på seljar si side. Det stemmer ikkje. Me skal hjelpa begge partar og jobba for at begge blir nøgde. Som kjøpar kan du forventa at meklaren har sett seg godt inn i bustaden og kan fortelja om standard og eventuelle manglar. I Eiendomsmegler1 skal me også kjenna området som bustaden ligg i og vita om nabolaget. Då vert me gode rådgjevarar for kjøparane også.