Byggjer for framtida
Bli kjend med det nyaste tilskotet til Eiendomsmegler1
Christoffer Naustvåg Lillestøl er det ferskaste tilskotet i Eiendomsmegler1. Her med Storhaug bakgrunnen, der han vaks opp.
Christoffer Naustvåg Lillestøl er det ferskaste tilskotet i Eiendomsmegler1. Her med Storhaug bakgrunnen, der han vaks opp.
Året er 2015.
Christoffer Naustvåg Lillestøl bur i Bergen.
Han er nyleg utdanna jurist og tek fatt på eit vikariat som advokatfullmektig heime på Stord.
Det han sjølv skildrar som ei nerdete interesse for bustadar gjer at eigedomsbransjen lokkar meir enn advokatyrket.
Christoffer Naustvåg Lillestøl er det ferskaste tilskotet i Eiendomsmegler1. Her med Storhaug bakgrunnen, der han vaks opp.
Like over nyttår i 2017 går startskotet for ei karriere som eigedomsmeklar.
I Garanti Eiendomsmegling er læringskurva bratt, og Lillestøl sit aleine på kontoret på Stord.
Nokre månadar etter går han over til konkurrenten, der han etter kvart får tittelen som den mestseljande eigedomsmeklarfullmektige i heile kjeda på landsbasis.
No gler han seg til å byggja framtida i Eiendomsmegler1.
CHRISTOFFER NAUSTVÅG LILLESTØL
30 år.
Eigedomsmeklar og fagansvarleg for Eiendomsmegler1.
Bur i Sætrevik i Sagvåg.
Familie?
Ein son på 9 år.
Favorittmåltid?
Pizza.
Draumereisemål?
Miami.
Favorittstad på øya?
Stovegolvet.
Ser på?
Klovn og dei fleste true crime-seriar.
Høyrer på?
Det meste, men akkurat no går det mykje i Eros Ramazzotti og Coldplay.
Tre ord som beskriv deg som meklar?
Audmjuk, nøyaktig og jovial.
- Som meklar prøver eg å vera han du har lyst å ha på besøk. Eg vil vera ein støttespelar og samarbeidspartnar for kundane mine, og har stor respekt for den enorme tilliten ein får som meklar.
Om oppveksten
Han er sjølv oppvaksen i ei trygg gate på Storhaug, like ved inngangen til Hystadmarkjo.
- Eg har alltid vore bortskjemt med fine turplassar like utanfor døra, og i Bergen gjekk eg mykje i dei sju fjell.
Etter at han kjøpte seg hus i Sætrevik i Sagvåg, er Nesskogen blitt næraste nabo. Her hentar han energi og koplar av.
- Det kostar å selja bustad, både i form av pengar og fritid. Difor kjøpte eg noko eg kan bu i livet ut. No har eg lettstelt hage og asfaltert oppkøyrsel, smiler han og legg til: - Det einaste eg saknar er sjøutsikta. Den vart eg godt vane med i barndomen. Det er noko eige med sjølufta. Utanom det trur eg at eg har funne draumehuset.
Speglar kundane
I ein konkurranseutsett bransje er det viktig å ikkje mista fokus på det som betyr noko. For Lillestøl er det å finne gode løysingar for kvar enkelt kunde.
- Eg er veldig glad i folk og trur eg er flink til å lytta til kunden sine behov. Seniorkundane treng kanskje ein grundig gjennomgang av prosessen og klare roller på kven som gjer kva, medan folk på min alder gjerne vil ha ting digitalt. Ein kjem opp i mange ulike livssituasjonar som meklar, for det er jo ikkje alle sal som er frivillig. Det kan vera både skilsmisse og dødsfall inne i biletet. Då er det viktig å kunna spegla folk, seier han.
Målbevisst
Lillestøl karakteriserer seg sjølv som målbevisst. Sjølv har han store ambisjonar både for meklarkjeden og regionen vår. Han er stolt over moglegheita som har opna seg for han i Eiendomsmegler1.
- Eg er audmjuk og fornøyd med å få eit så stort nettverk i bakhand, Eiendomsmegler1 er trass alt Noregs største eigedomsmeklar. Me har ei sterk merkevare i banken og moglegheit for å skreddarsy dei beste løysingane for kundane våre, fortel den unge meklaren.
- Det er spesielt to ting som driv meg i arbeidet. Resultat - og det at ein får følgje med kunden frå første møte til oppgjeret er gjennomført. Kjøp eller sal av bustad betyr så mykje for dei involverte personane. Å ringa å fortelja nokon at dei har kjøpt bustad kan kanskje samanliknast med ein telefon frå Hamar. Anten vert det full jubel i den andre enden, eller så vert det heilt stille.
Built with Shorthand